吴博士讲历史 | 珠江开渔 芦苞寻鲜

7月1日是珠江流域开渔嘅第一日，经过禁渔期嘅颐养之后啲河鲜会更加多、更加肥美，我特登同一班朋友来到三水芦苞，准备品尝正宗嘅，北江“头啖鲜”。

广东人捕鱼、食鱼嘅历史，最早可以追溯到5000几年前。高明古椰贝丘遗址，出土有大头（鳙鱼）、黄骨（黄颡鱼）、和顺（翘嘴鲌）等鱼嘅骨骼，表明新石器时期佛山境内已经有捕鱼作业，可以食到好多种类嘅鱼。呢个同佛山河道纵横嘅地理环境密切相关，早系八百几年前，元代大德《南海志·水族》篇就指出：“天地中间，海为最巨，资生之物，厥族惟错。”

捉鱼，最叻嘅梗系疍家人啦。明代嘉靖版《广东通志》记载：“蛋户者，以舟楫为宅、捕鱼为业。”清代道光版《高明县志》指出：明清时期“高明无蛋，以其渔课隶三水也”。所以，康熙版《三水县志》记载有青江、西江等十个“蛋埠”，接近有500只疍家艇停靠，分布广泛，数量众多，可想而知，产出嘅河鲜一定唔会少。清代几种《三水县志》，就记载有鲈鱼、嘉鱼、鳎沙等二十几个名贵鱼种。好多品种，而家都仲可以见得到、食得到。

之前我同大家分享过，野生河鲜嘅口感，并唔似海鲜咁“爽滑弹牙”，而系绵、嫩、淋，最好食嘅唔系鱼腩，而系脊肉。疍家人仲教过我一招：劏鱼之前剪咗个鱼鳃，再将佢放翻入水桶游半个钟，可以最大限度咁去除血腥味。肌间刺多嘅鱼，适合成条蒸，尽量唔好切开或者系鱼身戒几刀。咁样，先至可以品尝到河鲜嘅原汁原味。

作为三水境内北江河道嘅重要汇合点，芦苞镇嘅芦苞涌，系古代连接粤北同广州之间嘅交通要道。从韶关南下嘅旅客，可以直接系度坐船向东转入广州，少走好多弯路。时至今日，芦苞渔业人口接近2000人，渔船300只。而且啊，河道交汇之处，河水更加喘急，养分更加丰富，生长出来嘅鱼会更加好味。咁好嘅机会，唔知大家想唔想来芦苞试翻下呢？

统筹｜毛蕾

文、出镜｜吴劲雄

视频、图｜记者刘浩斌